Chinkhanmanga Thomte
NESO
Council Member
Mihring kan khawsak ho naah reng
reng hian dan mumal tak a awm loh chuan khawsak ho a harsa a, dan mumal tak kan
mamawh thin. Dan hi ziakin emaw, ziak kher lo pawhin neih theih a ni a; ram,
khawtlang, chhungkua leh mimal thlengin dan kan nei deuh vek thin.
 |
| MZP Logo |
Dan hi mihring te hian keimahni kan
in siam chawp a ni tlangpui a, a bawhchhe tu pawh mihring tho kan ni a. Mahse
keimahni zawh tawk leh a hmangtu ten a kan zawh tawk tur a siam a ni a. Kan
that tlan na tur a kan hmathlir leh duhthusam te tihlawhtling tur a min vengtu
leh kaihruaitu kan ti thei bawk ang.
Khawvel ram hrang hrang te hian in
kahihhruai na dan an siam in an nei theuh a, Mizoram ngeiah pawh- tlawmngai
pawl, kohhran, khawtlang thlengin dan tha pui pui kan nei theuh a. United
Satate Danpui kum 1787 a ziak a an neih hi khawvel a Danbu upa ber niin an sawi
a, India Danbupui hi khawvel a Danbu sei ber niin, Monaco Danbu hi khawvel a
Danbu tawi ber a ni bawk.
MZP Danbu hi Mizo Zirlai Pawl ten a
inkaihhruai na atan a kan hman ber ni a,
tuna kan hman mek hi Atricle-22 a then sawm niin. MZP Danbu hi vawi engzat nge
siamthat (amendment) a nih tawh tih chiang fak a sawi a harsa deuh tawh a,
Mahse record hriat theih chinah Lushai Students Association (a hnu kum 1947 a
MZP ti a thlak) Shillong a din a nih khan Danbu an siam nghal a, heihi sap
tawngin an letling nghe nghe a ni. Heng hunlai atang tawhin MZP thupui tan- 'Tanrual hi chakna', tih an lo hmang
tawh a, hetih hunlai a MZP dinchhan leh tunlai a MZP pawl thiltum te chu a dang
deuh nual tawh niin a lang.
MZP Dnbu thuhmahruai 'MZP Tobul',
in a tarlan danin kum 1953, 1969 leh 1971-ah te Dan hi siamthat (amend) a ni a,
kum 1993 a MZP siamthat a nih khan Danbu hi nasa tak a siam danglam (re-construct)
niin a hriat bawk. Hemi hnu hi chuan Assembly neih apiang deuhthawin a tul dan
a zirin tlem te te a siamthat niin belh emaw paih a awm nual tawh.
Kum 1993 hmalam leh tun hnu a pawl
chhinchhiahna emblem hi a design chu a la ngai reng a, mahse siam danglam hret
a ni. Pawl rorelna sangber leh khawmpui pawh Conference tih thin kha 1993 hnu
lamah chuan Assembly ti a koh a ni tawh a, pawl thiltum te pawh tunhma aiin
zofate zawng zawng huap zo deuh tur a duan a ni bawk. Tun a kan danbu hman mekah
hian Zofa chi peng hnam hrang hrang ten an mahni pual a zirlai pawl an neih te
article-17.1 ah ziaklut in, chanvo pawimawh tak a neih tir mek a ni.
Kan danbu hman mek article-22 a
thenah hian chiang takin; MZP chu eng ang pawl nge a nih a, eng ang a in
kaihruai nge a nih te, hruaitu te chungchang te, inthlan dan te, thubuai hla
buai chungchang te, pawl din leh thiah dan tur te, rorel dan leh in awp a
inkahihhruai dan tur te mumal tak a ziahlan a ni. Heng danbu hi engtik lai pawh
a min kaihruaitu atan kan hman reng a ngai a, duhkhawp loh leh khawvel kal zel
mil a herrem ngai a awm pawhin, zah tak chung a a siam that dan tur dik tak a
siam that hi a hmangtu te tan a him ber dawnin a hriat a. Heng danbu hi
hnawksak riau a kan hria a nih chuan kan kal dik tawklo tihna a ni bawk ang.
Pawl thiltum article-3 in a tarlan
te hi kan hmalak na kawng hrang hrang a min kaihruaitu atan kan hman a ngai a,
heng pawl thil tum point-11 te hi MZP kuang leh kuanglo thliarna tur a ni ang.
Pawl thiltum tihlawhtling tur zawng a kan kal a, hma kan lak ngat chuan tuma sawisel
theih pawh kan ni lo. Article-4 nain a tarlan angin pawl din kawngah hian
General Headquarters hian thuneihna sang tak a nei a, Zoram pawnah hian Joint
Headquarters din theih niin chu chu Sub-Headquarters dinhmun ang tur a ni a.
Mahse tun dinhmunah Joint Headquarters kan nei rih lo a ni.
MZP Member chungchang hi article-5
naah tarlan a ni a, Mizo zirlai zawng zawng hi member a pawm a ni. Kan danbu
hian member te hnenah membership fee a tul ang a Rs. 10/- ai tamlo khawn min
phalsak a, hei hian kan annual budget leh pawl hmalakna atan a tangkai bakah
pawl in tun nun nan tangkai tak tur niin a lang. Member zat in hriat nan te leh
member te fee pe ngei a in ziahluh hian pawl kan in ti neitu bik a, membership
fee khawn te hi danbuin a phal bawk a, uar sauh sauh ila pawlin a thatpui ngei
a rinawm.
Pawl hruaitu (thlan) te mawhphurhna
leh chanvo hi chipchiar takin article-8 naah tarlan a ni a, article-9 naah
Executive Committee te dinhmun leh committee inkahihruai na te tarlan a ni bawk.
Kan mawhphurhna te leh rorel dan kalphung chiang tak a tarlan ni chung a kan
chianglo ta fo a nih chuan kan danbu hian awmzia a neilo tihna pawh a ni ta ve
ang. Article-10 naah hian pawl in awp dan leh thuneihna chiang takin tarlan a
ni bawk a, rorel na hrang hrang leh rorel thei tur te a in ziak a ni. Assembly
hi pawl inkhawmpui leh rorelna sang ber a ni a, a dawttu a rorelna sang ber hi
Federal Coucil a ni. Heng Federal Council hian Genral Headquarters hnenah hian
Headquarters leh Sub Headquarters thiah phalna hial a pe thei a ni.
Headquarters leh Sub Headquarters
hian an huam chhung bik in enkawl leh hmalak dan tur ngaihtuah nan kumtin
Conference an nei thei a, Council hi a tul dan a zirin an ko thei bawk. Branch,
Sub Headquarters leh Headquarters zawng zawng te khaikhawmtu chu General
Headquarters a ni a, Sub Headquarters leh Branch eng emaw zat hian Headquarters
siam lehin Branch eng emaw zat awp turin Sub Headquarters din a nih thu
article-10 na hian a tarlang bawk.
Article-11 naah hian inthlan dan
tur leh hruaitu ni thei te ziah a ni a, article-12 naah chuan vote nei te leh
vote neih dan tur kimchang tarlan a ni a. Article-13 naah chuan hruaitu te
chanvo chelh theih hunchhung chiang tak a tarlan niin, pawl chhung buaina tam
ber sum leh pai pawh article-14 naah ziah lan a ni. Pawlchhung buaina leh
midang nen a buaina chungchang hi article-15 naah hian ziahlan a ni a, Pawl
chhung buaina a awmin tumahin Court-ah thlen loh tur a ni a, General
Headquarters buaina chu Executive Committee in a rem theilo a nih chuan Federal
Council hian a chingfel tu tur 'Jury of Appeal' a siam ang a. Headquarters, Sub
Headquarters leh Branch te thubuai hi an mahni awptu te hian tha an tih ang a
an rel fel tur a ni thung. Midang nen a buaina a awm pawhin an mahni an in
chingfel theilo a nih chuan an mahni awptu te hian tha an tih ang a an chinfel
tur niin a in ziak a ni.
Article-16 naah hun khaihlak
chungchang tarlan a ni a, Pawl zawmna hi article-17 naah ziahlan a ni bawk. MZP
hi mizo zirlai zawng zawng huapzo a nih avangin Mizo zirlai zawng zawng huap si
lo pawl;- Hnambil, Zirna Course chi khat bik hming leh zirlai hamthatna atan a
pawl din (Mizo zirlai zawng zawng huap silo) te tan pawl zawmna (affiliation)
tih theih a ni a. Heng article 17.1 'hnambil hming a zirlai pawl indin te', tih
hnuaiah hian tunah zirlai pawl pariat (8) an in ziaklut mek a ni. Article-18
naah hian pawl hruaitu ban theihna dan chipchiar takin a in ziak a, he bung leh
chang i hman a ngai fo ang tih a hlauhawm hlein ka hria.
'MZP inawp dan a mumal zawk theih
nan Pisa (office) nghet nei theuh tum nise', tiin article-19 na hian a tarlang
a. Tun dinhmunah hian MZP Pisapui/ Pisa hi hmun hrang hrangah neih tawh niin
kan nei mek zel a, nei thar tur a hmala mek kan awm teuh hi hmasawnna lawmawm
tak a ni. General Headquarters atang a Branch thleng a Pawl Chanchinbu nei
theuh tur a article-20 nain min phut ang hian neih theuh pawl tumin tan la thar
leh ta ila hmasawnna duhawm tak a va ni dawn em...!
MZP history han en hian pawlin chak
chang leh chak loh chang te, han tluk deuh rap rap chang kan tawng ta zauh zauh
a. Chuvang te pawh a ni ang kan danbu duangtu te hian article-21 naah pawl a lo
tlukchhiat palh pawh a bungrua dahthat dan tur mumal takin an lo duang a,
Branch/ Sub Headquarters/ Headquarters te hian an mahni awptu te hnenah dahluh
tur a ni a. General Headquarters bungrua chu Higher & Technical Education
Department kut a dahluh tur a ni thung a. Heng pawl bungrua te hi MZP a
digchhuak leh a nih chuan lak kir leh tur a ni thung. Article tawp ber bung 22
naah hian danbu siam that dan tur a in ziak lang a, a hmangtu te'n a siamthat
tul kan tih chuan siam that theih a nih dan mumal tak a ziak a nih avangin zawm
hi kan mawhphurhna a ni.
Dan zah tak chungin chak leh
huaisen takin kal ila, kan din chhan ti hlawhtling turin hmalam i pan hram hram
ang u.