-Chinkhanmanga Secy. i/c Publicity
Khawvel ah hian pawl hrang hrang a tam em em a, eng pawl pawh hian thiltum leh dinchhan (Mission) an nei theuh bawk. Pawl thiltum leh thuthlung te hi tha viau mahse a kengkawhtu leh hmangtu/ hruaitu a zirin a tangkai in a tangkai lo thei a, a hlawhtlin dan pawh a dang thei hle.
Mizo Zirlai Pawl (MZP) Kum 1935 October ni 27-a din pawh hian Thiltum 11 lai a nei a, heng a thiltum hrang hrang te hmang hian hma a la in hna a thawk thin a ni. Mahse tu ten emaw MZP hi ‘kuang lo nawr’ tiin an sel fo thin a, MZP kuang chin hrelo tan chuan MZP hi pawl thianghlimlo tih mai te pawh a awl ta ve ang. MZP hi Firm and Society Act hnuaiah No. 35 of 1969-90 a registered a ni a, ‘Tanrual hi chakna’ tih thupui hmang in, ‘Mizo zirlaite kan Ram leh Hnam tan’ tih thuvawn a nei a ni. MZP danglamna pakhat chu Zoram dung leh vanga Zirlai awm zawng zawng te pawh kan in thurual in kan tangrual tlat thin hi a ni. MZP Thuvawn hi Ram leh Hnam tan a nih angin ram leh hman nghawng thil reng reng hian MZP ngeng a chhun a, zirlaite kan che chhuak thin ni.
MZP Thiltum hrang hrang 11-te bihchianna lo nei dawn ila, chutatang in MZP in kan kuanglo kan lo nawr thin reng em tih leh kan thiltum kan hlenlo zawk em tih kan hre thei ang.
1. MIZO ZIRLAITE INPUMKHATNA NEIH: MZP Thiltum hmasaber hian a tarlan angin MZP hian Mizo zirlai zawng zawng ten inpumkhatna kan neih hi a hna pawimawh tak mai a ni a, chumi atan theih tawp in hma ala thin bawk. MZP chuan Mizo zirlai tupawh puih an ngaihna ah a pui hreh ngai lova, kawng kawhhmuh in theihtawp in zirlai te a tanpui thin. Zirlai ten inpumkhatna kan neih theih nan MZP chuan hmun hrang hrangah Headquarters, Sub-Headquarters leh Branch te a din bakah Zo-Hnahthalak / Mizo chi peng hnam hrang hrang Zirlai Pawl te nen thawhhona tha tak a nei bawk a, MZP hi Inpumkhatna pawl a tih theih bawk awm e.
2. MIZO HNAM LEH ZIRLAITE CHANVO DIKNA HUMHALH: Mizo hnam in harsatna a tawh chang te leh Mizo te dikna chanvo laksaka rahbeh a nih in, MZP chuan Mizo Hnam dikna humhim a nih theih nan a zia a chhuah in theihtawp in hma a la thin. Chutiang bawkin zirlai ten a chanvo tur a chan loh in emaw rahbeh sak a nih in MZP chuan huaisen takin hma a la in ke a pen thin a, a hmanraw hman chu eng pawh ni se MZP chuan Mizo Hnam leh Zirlai te chanvo dikna humhalh tur hian tha a thawh reng thin a, a tul dan ang zelin hma a la zel dawn a ni.
3. KUTHNATHAWH UAR LEH CHAWISAN: MZP chu kuthnathawh uar leh chawisan thiltum nei a nih angin, mahni kut ke a ding te a ngaisang em em a, Zirlaite mahnia intodelh a kuthnathawh zahpui ngailo turin a fuih bawk thin. MZP member te chu kuthnathawh zahpui lo a, mahni a intodelh tum tlat mi a ni tur a ni a, MZP ah mi zelthel leh kuthnathawh hmusit te tan hmun a awmlo niin a lang.
4. EIRUKNA LEH HLEMHLETNA DODAL: MZP chuan Eirukna leh Hlemhletna a ngai theilo hle a, chutiang ti mi te chu a ngaisanglo mai ni lo in a dodal bawk a ni. Eirukna leh hlemhletna hian kan ram a tichhia in Hnam mualphona a nih bawk avangin chutiang lak ata fihlim ngam turin MZP chuan tu te pawh a beisei a, hetiang lak atang a fihlim lo te tan MZP Thuthlung hi tawm theih a ni lo. Hemi kawng a hmalakna chikhat atan MZP chuan Lok Ayukta Mizoram-ah din a nih theih nan hma nasa takin a la a, tunah sawrkar hian a tihlawhtling dawn ni a hriat a ni a a lawmawm hle a ni.
5. MIZORAM LEH HNAM TANA MI TANGKAI NI TURA ZIRLAITE BUATSAIH: MZP chuan zirlaite kan Ram leh Hnam tana mi hmantlak, mi tangkai ni turin a duh a, chumi atan inbuatsaih in kawng hrang hrang ah hma a la thin a, Mizo zirlai tawh phawt chu nakin atan mai ni lovin tunah pawh kan ram leh hnam tana mi tangkai ni turin a duh a ni. MZP chuan zirlaite kan ram leh hnam tana mi tangkai leh hmantlak a chherchhuah a nih theih nan Zirna tha leh thiamna tak tak an dawn theih nan hma a la nasa em em a ni.
6. MIZO HNAM NUN ZEMAWI LEH THA APIANGTE HUMHALH A CHAWISAN: Mizo hnam nun zemawi leh rohlu hrang hrang heng- tlawmngaihna, huaisenna, rinawmna, thian chhan thihngamna nun te, induhsakna te, unau in hmangaih tawnna leh ram leh hnam hmangaihna rilru te ngaihsan a chhawmnun hi MZP thiltum pawimawh tak a ni. MZP tawh phawt chu heng hnam nunzemawi te nunpui a chawinung tur kan ni a, zirlai te hnen a zirtirna pek hi a tul hle awm e.
7. INCHIMRAL THEIHNA LAKA MIZO HNAM HUMHALH: MZP chuan Mizo hnam hi humhalh a ngai tih a hria a, hnam dang leh lian zawk te chimral theihna kawng hrang hrang lak atangin Mizo hnam a him theih nan hma nasa takin a la thin a ni. Mite sawiselna karah pawh nise MZP chuan hnam humhalhna tur a nih phawt chuan tuar pawh huam in nasa takin hma a la thin a ni.
8. RAM LEH HNAM HMASAWN THEIH NANA SAWRKAR TANPUI: Ram in hma a sawn theih nan atul anga sawrkar tanpui hi MZP ze pawimawh tak a ni. Ram leh Hnam tana tha tur kawng hrang hrang a Sawrkar finchhuah te, tanpui te leh an tha tihchak te hi MZP hmalakna langsar leh pawimawh tak pakhat a ni.
9. MIZORAM LEH HNAM TLUCHHE TUR VEN TLAT: Mizoram hian kawng hrang hrang in chhunglam leh pawnlam ah beihna a tawk ve reng a, Ram leh Hnam tan pawh a tlukchhiat hlauhawm khawp harsatna lo thleng thei hrang hrang leh min thendarh thei lak atang a Ram ven hi MZP chuan a mawhphurhna ah a ngai a, Mizoram leh Hnam ven hi MZP Member zawng zawng te mawhphurhna a ni.
10. ZOHNAHTHLAK HNAM HRANG HRANGTE INPUMKHAT: MZP hmalakna langsar leh lian tak pakhat chu Zohnahthlak Hnam hrang hrang ten inpumkhatna kan neih theih nana ke a pen ve reng hi a ni. ‘Zohnahthlak hnam hrang hrang, khawvel hmun hrang hrang a cheng te hian tawng hrang hrang hmang mah ila Unau kan ni a, thlahtu thuhmun kan ni e’ tiin MZP chuan Zo Hnam ropui tak hi inpumkhat a kan awm theih nan hma a la ve reng a, hemi kawng a hmasawn theih nan tiin sum tamtak seng in ZOFEST a buatsaih thin a, khawvel hmun hrang hrang a khawsa Zo Hnam hrang hrang te nen he khawmpui hi hman thin a ni. Hmasawnna hmuh chhoh mek zel a ni bawk.
11. PI LEH PUTE ATANGA ZOFATE LUAH CHIN RAM RORELNA PAKHAT HNUAIA AWM: Kan pi leh pu ten lu chhum ban chhum huam a an lo sah zau ram, tuma awpbehna hnuai a awm lo in mahni a ro inrel a an lo khawsak tawhna ZORAM hi hnam fing hmasa ten khawvel in her danglam zel avang in min thendarh in min awpbet a, kan duhthlanna tel hauh lovin ramri min khamsak in India, Bangladesh leh Myanmar (Burma) ah te dah kan ni a, sawrkar hrang hrang awp kan nih avangin kan duhdan te, kan nundan te, kan nunphung te inanglo in kan tawng te pawh a danglam hret hret mahse, MZP chuan kan Pi leh Pu te atanga Zofate luahchin ram hi rorelna pakhat hnuaiah ala awm a ring in a beisei tlat a, a ringhlel ngailo. Tun maiah thleng lo mahse ZORAM THAR hi beiseina mit in a thlir reng a, Zoram thar ah Zofate inngeih tlang takin mahni a ro in rel in khawvel ah hnam ropui tak ala ni dawn tih hi MZP rilru a ni.
Hemi atan MZP chuan inpumkhat hmasak a tul in a hria a, hemi kawng ah tha leh zung a seng hnem em em a, hma a sawn hret hret a ni.