ZOFATE CHAWLHBUK : BORAPANSURY

- Chinkhanmanga, Secy. i/c Publicity (2014)

(He Article hi MZP Chanchinbu 2014 Vawkhniakzawn Thla Vol. 21, No. 28 phek 3-naah tihchhuah tawh a ni.)

MZP Chanchinbu thla hmasa chhuakah khan MZP Thiltum sawmpakhat (11) te bihchianna kan chhiar tawh a, MZP din chhan ni a lang ta chu ‘Ram leh Hnam humhalh’ hi a ni kan ti thei ang. Chuvang in MZP chuan Ram leh Hnam tan kawng hrang hrang in hma a la thin a, MIZO hnam thlavang a hauh tang tang thin.

MZP chuan kan ram chhunga kan mikhual huangtau hnamdang Chakma te hi a ngaimawh in hnawk a ti hle a. Mizoram chhunga an pun chak dan em em te hi a uipui tuilian thlir mai mai theilova, MZP hruaitu hmasa te atangin Chakma dan lova Banglabesh atang a lo lut te duhloh na lantir nan leh hnawhchhuah an nih theih nan- Longmarch (Aizawl-Chawngte) te, Quit Chakma Foreigners Movement te, Chakma Census te neiin hma nasa takin alo la tawh thin a ni. Heihi MZP mai nilovin Zoram mipui zawng zawng ten kan vei tlan a kan ram hi a himlo a ni tih kan hriattlan a kan thangharh hi MZP duhdan a ni.
Kum 1901 chhiarpui ah khan Mizoramah Chakma mi 198 chauh an awm a, Mizoram a awm theihna Permit pek an ni a, chhiah an chawi thin, chumi awmzia chu Mizoram-ah mikhual mai an ni tihna a ni. Bangladesh atang in a rukin an lo pem lut a, tunah chuan Sing tel an lo ni ta, District Council te neiin an huangtau sawt hle a, Mizoram sahhek tum a hma la ve reng in, mikhual sumhmun a riak thin kha a thlenin te khumpui a lawnkai a tum mek a nih hi maw....

Mizoram Lawngtlai District huam chhung Chakma District Council a khaw pakhat Borapansury, Village Council pahnih in a awp (Tuna Minister B.D.Chakma khua, Chakma te chennaah chuan Chawngte tih lohah a lian ber a ni) khua-ah hian Mizo sumdawnga zin ten harsatna an tawh thin bakah, a ram neitu zawk Zofate hnen atangin Pawisa an lo khawn thin tih thawm te a awm avangin, Ni 23 August, 2014 khan Tlabung a MZP Headquarters Lunglei Conference hmang zo, MZP hruaitu engemaw zat te chuan thil awmdan a hmuna enfiah turin Borapansury an pan a, Borapansury I leh II Young Chakma Association (Y.C.A) hruaitu te chu Meeting an neih pui a (V.C te an zin hlan a nih avangin meeting-ah an tello), thil awmdan te zawtfiah in Mizo sumdawngte hnen a pawisa an lak thin chu thalo an tih thu te sawi in, ti tawhlo turin an hrilh a, an khawchhungah Mizo sumdawng te leh zin veivak te chawlh hahdam nan ‘Zofate Chawlhbuk’ sak an duh thu an hrilh nghal a, Chawlhbuk sakna tur hmun ngaihtuah pui tur a an ngenna te pawh puih an inhuam thu khawtlang hruaitu te hian an sawi nghe nghe a ni.


MZP Headquarters Lunglei chuan Borapansury hi kan ram, Mizoram huamchhung  ngei a nih zia lantir nan leh he hmun tlawh a kal thin Mizo hnahthlak ten chawlh hahdam nan a an hman theih tur in ‘Zofate Chawlhbuk’ sak ngei tulin a hria a, theihtawp a hma la chho nghal in- CADC Executive Member (E.M) te, Borapansury khawtlang hruaitu V.C, leh Y.C.A, te leh biak ngai apiang te chu bia in an hmu a, meeting te pawh vawi tamtak a neihpui a ni.
Harsatna a awm awm hriat a ni lova, Borapansury lam pawh an in hawn em avangin Ni 10 February, 2014 khan MZP Headquarters Lunglei te chuan sak an tum a, an in buatsaih mek laiin Chakma lam ten harsatna aruk a an lo siam avangin Mizoram Police te chuan Borapansury a kal tur Lunglei atang a chhuak te chu Lunglei daiah an lo dang a, Tlabung lama Advance Team a kal te pawh an lo dang a, MZP Lunglei Boarpansury pan a kal te leh Tlabung a awm Headquarters Lunglei advance team te leh Tladung Sub-Headquarters hruaitu te chu Cr. PC Section 151-na hmang in an man ta vek a ni. MZP Hqrs. Lunglei hruaitu te chu Lunglei Police Station-ah hren an ni a, Tlabung lama hruaitu awm te Tlabung Police Station-ah hren an ni bawk, tlailam dar 4:00 khan PR Bond Sign tir in an chhuah ta chauh a ni. Hetiang a MZP Hqrs. Lunglei Advance a kal te hriat tur in Mizoram Chakma Students’ Union (MCSU) hruaitu te chuan ‘In duh leh in ram ah sa mai rawh u’ an lo tihkhum a ni.

Hetia MZP Headquarters Lunglei hruaitute kut phuar anih takah chuan Chawlhbuk sak hna chu MZP General Headquarters kut a an dah tawh thu Headquarters Lunglei chuan thuchhuah an siam a, MZP General Headquarters pawhin Lunglei Headquarters kutphuar a nih tak avangin atul dan ang a hma a lak tur thu leh arang thei ang ber a ‘Zofate Chawlhbuk’ sak a nih tur thu Ni 11 February, 2014 khan thuchhuah a siam nghal a ni.

Hetiang boruak a awm takah chuan Zoram mipui an thangharh a, mi tamtak chuan Chakma te Mizoram a an huangtau tawh zia an hriatthar phah a MZP thiltih tha an tih thu an sawi hlawm. 
MZP General Headquarters chuan hma la mai lovin MZP rorelna sang Federal Council Sitting vawi 42-na, Ni 11 March, 2014 a MZP Conference Hall a neih ah a chhawp chhuak a, Zofate Chawlhbuk sak ni atan Ni 20 March, 2014 chu ruat nghal a ni. MZP General Headquarters chuan inbuatsaihna kalpui nghal in Ni 18 March, 2014 khan lamkal (Advance Team) a tir a, mahse Mizoram M.P (Lok Sabha) inthlan dawn a nih avangin leh remchan zawkna avangin Ni 19 March, 2014 zan a MZP Emergency Executive Meeting chuan M.P Election zawh lamah a sakna tur ram a fel loh bawk avangin Sawrkar lam hotu ten a hmun tur min ngaihtuahpui an in huam thu an sawi bawk avangin a ram hi tihfel law law a sak nise tiin Ni 20 March, 2014 a sak tum chu thulh rih nise tiin a rel a ni.

Sawrkar lam hotute tawngkam tha umzui nghal niin, Ni 2 May, 2014 khan L.Ramdinliana Renthlei General Secretary ho in General hruaitute bakah MZP Sub-Headquarters Tlabung hruaitu te leh Food & Civil Supply Department hotu te bakah CADC lam hotu te nen Zofate Chawlhbuk sakna tur Food & Civil Supply Department ram awl Sq.m. 2,500 chu va teh fel a ni a, ram chhinchhiah nan Signboard pahnih- ‘Site for Zofate Chawlhbuk’ tih leh ‘I ram leh Hnam humhalh rawh, khawvelin a dem lovang che-MZP’ tih thuziak te tar nghal a ni.

Hetiang a MZP in Zofate Chawlhbuk sakna tur ram chhinchhiahna Signboard a tar chu Chakma NGO hrang hrang 11 te chuan an hleh in an duhlo hle a, Ni 3 June, 2014 hma a lakthlak a nih loh chuan CADC Bye Election Ni 4 June, 2014 a neih tur chu Boycott an tum thu an puang a ni. Chakma NGO ten Signboard tar an helh em avangin Pu Lalhmachhuana, President MZP General Headquarters, Lunglei MZP in Zirlai titha te chawimawina hun an buatsaih hmanpui a kal chu thil awmdan te hrechiang turin hruaitu engemaw zat nen Borapansury-ah an tlang nghal a, “Signboard hi lakthlak a nih dawn chuan min thah phawt a ngai ang” tiin MZP President Pu Lalhmachhuana chuan Chakma NGO te a hrilh. Hetiang a nih takah chuan Signboard chu lakthlak a ni ta lova, Chakma NGO te chuan CADC Bye Election Boycott an tum chu an titlang ta a ni.
CYMA CEC Ni 7 June, 2014 a neih chuan, MZP in Zofate Chawlhbuk sak an tum Chakma NGO ten an dodal chu an hriatthiam loh thu, an dem thu leh an thlawp thu an passed a, ZNP leh PAMRA te pawhin MZP in Zofate Chawlhbuk sak a tum an thlawp thu thuchhuah an siam.

Ni 11 June, 2014 khan Directorate of Food Civil Supplies & Consumer Affairs chuan Letter No. D.11031/2/2011-DTE(SPY) hmangin an ram-ah MZP in Zofate Chawlhbuk sak an remtihna lehkha an siam a. Hetiang a a ram ber a fel takah chuan MZP chu Chawlhbuk sak tumin a in buatsaih leh a,  Ni 25 June, 2014 khan MZP General Headquarters bultum in MZP hmun hrang hrang a mi te nen Zofate Chawlhbuk thu hmahruai atan Ft. 12 bial a zau In chu harsatna awm miah lovin sak a ni ta.

Mizorama tlawmngai pawl lian ber Y.M.A chuan Y.M.A Day-2014 President Thuchah-ah MZP in Zofate Chawlhbuk sak a tum an thlawp thu an sawi bakah, Y.M.A Sub-Headquarters hrang hrang te nen a meeting an neihah, MZP in Zofate Chawlhbuk a sak nan hian tha leh zung bakah a tul dan ang zel a Sum leh pai pawh a puih an tum thu an sawi hian mi a ti phur in Y.M.A hian Mizo te tan Pa nih a tlin hle in a hriat a, Hnam thilah chuan Mizo te hi kan tangrual hle a ni tih a lang bawk.

Mizo mipuite hian he Chawlhbuk sak hi an thlawp tha hle a, mi tamtak in Hnam hmangaihna an neih thar bakah Chawlhbuk sak leh na turah tha thawh ve an duh in kutthlak ve an duh avangin MZP chuan remchang siamsak tha in a hria a, hnam thil a nih avangin MZP Pisa Pui a kal remchanglo te tan pawh awlsam taka thawhlawm an thawh theih nan Aizawl hmun tamtak bakah Mizoram District Capital tinah BAWM a dawh a ni. MZP chuan hun remchang hmasa berah hian Zofate Chawlhbuk changtlung zawk sak hna tan a tum a ni. 

“Kan ram a dan lova Chakma pung chak tak ten saw lai ram saw (Borapansury) an ta neih hi kan phal lova, kan ram ngei a ni tih chhinchhiah nan leh Mizo mipui ten kan ram chin kan hriatchian nan MZP in Borapansury khuaah Zofate Chawlhbuk sak tum kan ni... Kan pi leh puten an thiam leh theih ang tawk  a an lo humhalh, Luchhum ban chhun huama an lo sah zau he Zoram humhalh hi keini thangthar te bat a ni.  Nakina kan inchhir loh nan i humhalh ang u. Vawiina Zofate Chawlhbuk sak hnatlangte hi mi vannei kan ni, he ni hi Mizo history ah a awm reng tawh ang.” - Lalhmachhuana, President.

"Aw Lalpa, ram humhalh tur min pek avangin kan lawm e, hnam hmangaih tur min pek avangin kan lawm e."- Lalsangzuala Ngente, Vice-President