Sawitu : Chinkhanmanga Thomte, NESO Council Member
Paite Dilect> A masain tuni a hawng pai, pi le pi, nu le pa, u le nau leh JAC heutu te teng teng MZP General Headquarters minin chibai ka hawn buk a hi. Kei ka hih leh Chinkhanmanga Thomte MZP General Headquarters a tu a NESO Council Member hi lel lel ka hi.
MZP General Headquarters chuan Manipur State Legislative Assembly in Manipur tlang mite tan a dan (bill) pathum thalo tak a passed avang a state sawrkar kut tuar a boral (martar) pakua zing a pariat te vui an ni dawn ta hi lawmawm kan ti hle a. Hemi kawng a sulsutu Joint Action Committee Against Anti-Tribal Bills (JAC-AATB) te hmalakna leh inpekna fakawm kan tiin, kan chhuang tak zet a,kan theihna apiangah a tul angin hma kan lo la ve thin a ni.
1. 2015 buai tirh khan Sinzawl to Tuivai Road siam a pawimawh tih Mizoram C.M hnenah kan lo thlen tawh a.
2. October 2015 khan kan President leh Adviser te engemaw zat mithi ralin an lo kal tawh.
3. Mizoram Joint NGO Co-ordination hmingin Central Govt. hnenah lehkha kan thawn.
4. Sinzawl to Tuivai inkar siam tur a a hawnna hun-ah te pawh kan lo telin, Mizoram CM hnenah Tantia ho road roller thawh turin kan lo dil bakah;
5. 2016 April thla khan JAC te Mizoram an lo kal khan theihtawp a lo buaipuiin, kan lo tawiawm a, an thlenna man te pawh kan lo tum sak a ni... etc..
MZP chuan Manipur Legislative Assembly in tlangmi (tribal) te tana pawi leh nghawng thalo tak nei tur heng (bill) pathum-
1. The Protection of Manipur people bill, 2015.
2. The Manipur Land Revenue & Land Reforms (7th Ammendment) bill, 2015.
3. The Manipur Shops & Establishment (2nd Ammendment) bill, 2015 te a passed ta mai kha pawi a tiin, lungchhiat thlak a ti takzet a.
He dan thalo tak passed a nih avang a kan Zofa unau mi pakua (9) laiin nunna hlu tak an chan phah kha na kan tiin, pawi kan ti takzet a. Amaherawh chu MZP chuan Manipur State chhung a Zofa unau chi peng hrang hrang te’n he dan pass a nih avang a min tanrual tir na leh, unau za ho a mipuite ram leh hnam tan a kan inthurual na hi lawmawm kan ti takzet a ni.
MZP leh Mizoram mipui te chuan Manipur Legislative Assembly in bill pathum (3) a pass avang a mithi chhungte thinlung takin kan tawrhpui takzet a. Chutih rualin hnam tan a nunna hlantu martar te kan chhuang takzet a ni. Lungrual takin ke pen ho zel ila, he thil thleng hian Zofate tan inpumkhatna tha zawk thlen ngei se kan duh a. Hun hmasa-ah chibil ang a in ep chang te, in lungrual loh chang te kan lo nei a nih pawhin khang zawng zawng kha theihnghilh vek ila, a thar a rilru zau tak puin he thil thleng avang hian inpumkhat zual sauh turin kan chah duh che u a ni.
Harsatna leh manganna kan tawh chang chauh a kan in unauna hre lovin, lawm hun leh boruak that hunah pawh unau kan nihna vawng nung chho zel turin MZP chuan thinlung takin kan sawm duh che u a. Khawvel hmun hrang hrang a awm Zofate kan inpumkhat theihna turin hmalam i pan ho zel ang u tih hi kan in sawmna a ni. Vawiin a mihuaisen (martar) kan vui liam turte thisen hian kan hnam tan rah tha vawiin atang hian chhuah sela, vawiin hi a bul tanna ni rawhse.
Kan insuihkhawm chuan kan dingchhuak ang a, hnam ropui kan ni ang. Kan tanrual loh erawh chuan a tu a te pawh hian boral hi kan hmabak a ni. Insuihkhawm zai rel ila, khawvel hriatah hnam ropui din ho ila, kan hnam tan a thil thalo chu i do tlang zel ang u.
Kan martar te an lei taksa thi tawh mah sela; kan hnam tan a an pek theih sang ber an hlan avangin, kan thinlungah an nung kumkhua tawh ang.
Ka lawm e
****Manipur Assembly House in 2015 a dan (bill) 3 an siam kha tlang mite tan a thalo tak a nih avangin nasa takin an dodal a. He hunah hian sorkar kut tuarin mi pakua an boral a, chung zing a mi pariat te ni 632 an dah hnuah ni 24th May, 2017 khan Lamka Public Ground-ah ropui tak a vui na hunserh hman a ni a, ground a lenglo khawpin mipui an pungkhawm a ni. Mithi te hi Martar park, Mata-ah ropui tak a vuiliam an ni a, motor sang chuangin martar te hun hnuhnung thlah turin an zui bawk.
He hunah hian MZP General Headquarters sawm a ni a, Elected OB hman thei an awm loh avangin Tv. Chinkhanmanga NESO Council Member chu pawl aiawh tur a ruat a ni a, a chung a kan tarlan tak hi pawl aiawhin a sawi a ni.