-Chinkhanmanga. Secy. i/c Publicity.
MZP chu zirlai pawl a nihna zawn ah hian zirlaite harsatna su kiangin zirlaite hmasawnna atan hian nasa takin hna a thawk thin a, zirlai harsa te tlan luhna inpui alo ni fo tawh thin a ni. A bik takin zirlai harsa puitu neilo te tan MZP hi tanpuitu alo ni fo tawh thin a, zirlai ten harsatna leh nekchepna a tawh apiangin MZP chuan a zia a chhuah bawk thin. Mahse hemi kawng a MZP hnathawh hian sawi a hlawh ngai lem lova, MZP pawh hian a puangzar (Publised) ngai lem lo niin a lang. Zirlai a tam thei ang ber te tana malsawmna nih hi MZP duh ber a ni fo thin a, MZP Thiltum Article 3-na (5) “Mizoram leh Hnam tana mi tangkai ni tura zirlaite buatsaih” tih a nih angin, zirlaite kan ram leh hnam tana mi tangkai, hmantlak, chhawrtlak ni tur a zirlai te fuih a tanpui, kaihhruai, kawhhmuh leh buatsaih hi MZP thiltum liantak pakhat a nih angin hemi kawngah hian ke a pen ve reng a ni.
Zirna kawng ah Mizo ten kan ngaih pawimawh leh kan dah san em em chu Matric (Class- X) result hi a ni awm e, B.A, M.A, ai pawhin kan dah pawimawh zawk emaw chu aw a tih theih hial a ni. Matric result chhuak hian mi zawng zawng a nghawng ni te pawhin a hriat a, kum tin zirlai sang tel hlawhtling mahse zirlai sang tel an fail bawk a, kum hnih kum thum beih hnu a hlawhtling hlei theilo te pawh an awm bawk. He Board exam a passed te thawm hi passed vanga hlim thawm a zawngah chuan a ri ring ber hial awm e.
Heti taka result pawimawh leh mitin ngaihvenah mi sing tel in Exam an bei a, chung zing a a ti tha filawr (Top-10) a Mizo lang phak te hi MZP chuan a ngaihlu in a ngaisang em em a chuvangin Kum 1995 atang a kumin thleng hian kumtin heng zirlai chhuanawm tak tak te ‘Chawimawina’ hun a buatsaih ziah a ni. He chawimawina hun hi a zawngchhangthlak hle a, kan hruaitu hmasa te hetiang hun bultan nachang an hria hi an fakawm hle a ni.
Kumin 2014 HSLC result lawmawm bik em em na chu Top-10 ah hian hnamdang an tam lo hi a ni, a bik takin topper te phei chu Mizo an ni a kan chhuang hle a. Kumin HSLC exam hi zirlai 18469 in an bei a, zirlai 12468 in hlawhtlinna an chan laiin zirlai 5614 in hlawhtlinna an chang zo ta lo va, beidawnglo a bei tang tang turin duhsakna kan hlan nghal a ni. Zirlai heti zozai zing a top-10 a langphak te lawmpuia chawimawina hun MZP General Headquarters bultum in Ni. 7th May, 2014 khan Vanapa Hall ah hman a ni a, Hall leng lo khawpin zirlai an lo kal a. Top-10 te hi lawmpuina thilpek chi hrang hrang hlan an ni a, zanriah tuihnai tak kilpui nghal an ni bawk. HSLC exam zawng zawng zingah hian a titha ber Topper te pahnih:- Lalremruati Sailo leh Malsawmzuala Royte te chanchin tlem in tarlang teh ang.
LALREMRUATI SAILO : Lalremruati Sailo hi Ni 6th May, 1997 khan Pu Lalhruailiana Sailo leh Dr. Lalthlengliani te fa hmingkoh ni turin Aizawl Civil Hospital ah alo piang a, an unau hi pathum an ni a, tun ah hian Chanmari ah an chhungkua in an khawsa mek a ni.
Class I-III hi Home Mission-ah zirin, Class IV-VII hi Dr. Graham’s Home’s, Darjeeling-ah a zir chhunzawm a, Class VIII hi Gospel Centenary School, Aizawl ah zir leh in Class IX & X hi St. Paul’s High School ah a zir. Remruati hi lehkha thiamthei tak a ni a, Distinction-ah passed chho deuh char charin, an class-ah Pakhatna a ni thin bawk.
Nitin darkar nga (5) lehkha a zir ziah a, Class X bik ah chuan a bei ngawrh ve hle a ni. HSLC exam a topper a nih bak ah Mathematics Subject bik ah mark hmu sang ber niin mark 100 ah mark 99-a hmu a ni. Science Subject hi lak chhunzawm tum in, Science-ah pawh Chemistry hi a tuina a ni a, ‘sial rang in sial rang a hring an lo tih angin’ a nu hnungzui a Doctor nih hi a chakber leh a tum a ni.
Tunah hian Chanmari Presbyterian Kohhran ah an lawi mek a, Senior Department zirlai niin inkhawm a ngaipawimawh thin hle a ni. HSLC Topper nih hi a in ring ngailo reng reng a, Topper a nih chhan chu “Pathian min puihna avang te, ka nu leh pa ten nasa taka min tanpui vang a ni” a ti a, a mah buaipui a, engkima pui a zirtir thin tu an Zirtirtu te chungah lawmthu a sawi mawlh mawlh a ni. “ Zirna chungchangah chuan nitin inthlahdah lova zir a, exam dawn a zir nghek ngai lova zir hi a tha hle in ka hria” a ti bawk.
MALSAWMZUALA ROYTE : Malsawmzuala Royte hi Ni 9th December, 1997 khan alo piang a, Pu Rotluanga leh Pi Lalthangzauvi te fa pali zinga naupang ber niin tun ah Chhingchip ah an chhungkua in an khawsa mek a ni. Kg I- Class I hi Presbyterian School Chhingchhip-ah a kal a, Class II-IV hi St. Peter’s Middle School, Chhingchhip ah kal in, Class VII & VIII hi Presbyterian English School, Chhingchhip-ah chhunzawm leh in, Class IX & X hi St. Peter’s School Chhingchhip- ah bawk a zir leh a, Class ah hian a thiam pawl niin pakhatna a ni deuh zel bawk a ni.
Lehkha hi zir nasa tia sawi tur a ni lem lova, nikhat ah darkar 2-hi a zir dan tlangpui a ni a, exam dawn thla hnih chhung vel kha chu ni khat ah darkar 14 te a zir thin a ni. Lehkha a zir loh lai a hunawlah chuan Music te a ngaithla ve thin.
Malsawmzuala Royte hian Science lak chhunzawm a tum a, Science Subject ah pawh Biology leh Mathematice hi a tuina a nih avangin lak chhunzawm a tum a ni. Class XI & XII hi St. Peter’s Chhingchhip-ah zir chhunzawm a tum a, Pathian in rem a tih chuan Doctor nih hi a tuina ber leh chak ber a ni bawk. Tunah hian Chhingchhip Presbyterian Kohhran ah an lawi mek a, Senior Department zirlai niin Sunday School hi a dam phawt chuan a thulh ngailo.
HSLC Topper nih a in ring ngailo mai nilovin, Top-10 pawh a beisei ngailo hrim hrim niin a sawi a, Pathian kaihhruaina vang liau liau a he hun thlengthei niin a sawi bawk a ni. A nu leh pa te hian a zirna chungchangah hian tawngtaina nen an pui thin a, an zirtirtuten an buaipui avangin an chungah a lawm hle a ni. “Awmze nei a lehkha zir hi a pawimawh hle a, Text bu hian eng nge min zirtir chhuah a tum tih chiang taka hre tura zir hi kei pawhin ka hlawkpui hle” tiin a zirlai pui te a chah mawlh mawlh a, Vanapa Hall a MZP in a chawimawi ni khan thu sawiin “Helai a ka thian te leh keimah pawh ka in chah nawn fo chu Matric a Top-10 a lan hi hlawhtlinna ala ni lo, abul tanna chauh a ni....” a ti a, ngaihtuah zui a ngai hle mai.
MZP hian kumtin HSLC Top-10 a chawimawi ziah a, chawimawi zing a mi te hi a en zui in beiseina sang tek nen a thlir reng a, chawimawi tawh te zing ah hian chanchin chhuizui tur nei lem lo hi mi tamtak an awm ve bawk a, he kan ram leh hnam tana mi tangkai ni turin MZP chuan a mi chawimawi te hi a duh takzet in a beisei a ni.
MZP General Headquarters chuan kum 2010 (MZP Platinum Jubilee/ 75 Years) atang khan kumtin HSLC Exam bei tur te tan a tangkai beisei in leh zirlai te rilru ah inelna thianghlim a awm theih nan tiin sum tamtak sengin MZP Inter-High School Quiz, Class-X zirlaibu behchhan in a siam thin a, heta school aiawh a lo tel te leh thlirtu zirlai naupang te hian an hlawkpui hle niin hriat a ni a. MZP Inter-High School Quiz 2013 a zirlai lo tel te result hi MZP chuan a thlirzui zel a, HSLC result hnuhnung berah hian Quiz a lo tel mi pathum te hi Top-10-ah an lang a, tin Top-10 a lang ta lemlo te pawh Subject pakhat tal a Letter Mark hmu te an nih hlawm avangin MZP chuan lawmawm a ti hle a ni. MZP Inter-High School Quiz 2013 a lo tel mi pathum HSLC Top-10 a lang te chu:-
1. Christina Lalnunfeli d/o H.Lalchhanhima. Top 3rd. Helen Lowry Hr. Sec. School.
2. Emily C.Zothanpari d/o C.Lalhriatpuia, Top 8th. Helen Lowry Higher Secondary School.
3. C.Lalnunchama s/o Vanlalmuana, Top 9th. Sihphir Venghlun High School.