 |
| Chinkhanmanga Thomte, AGS MZP GHQ Organising Secy. Assembly 2022 |
He hunah hian bialtu MLA Dr. R. Lalthangliana Minister, Pu Lalchhandama Ralte Minister of State leh Pu Robert Romawia Royte Minister of State-te chu hun hrang hrangah khuallian an ni a. Assembly an ti phuisui takzet a ni.
Hnahthial Bawrhsap Pu R. Lalremsanga chu Assembly Uaptu a ni a, Pu Lalneihthanga Colney Hnahthial BDO chuan "Zo ze chawini" hun min hmanpui bawk. An ni pahnih hi Assembly neihna Darzo khua Administration leh Development lama awptu an ni bawk a, Programme hlawhtlinna atan hian an thawhhlawk dun hle.
Rorel inkhawm hi ni 27 October, 2022 zing dar 7-ah neih a ni a, pawl aiawh (rorel palai) 170 kan kalkhawm thei a, ropui hle. Chutih laiin Rorel Agenda thenkhat a ulh deuh avangin, hun danga thleng ngai lo thil thleng te a awm. October ni 27 hi MZP din champhaphâk leh Zirlaite Ni a nih avangin khawmpui palaite Darzo khaw chhung chhim leh Hmar-ah inthenin, khawchhung tihfai hnatlang neih a ni a. Darzo khaw chhunga kum upa ber mipa leh hmeichhia thilpek hlan an ni bawk.
Assembly thupui, "Zirlaite- Zofate leh Zoram tan" tih chu Pu Lalnuntawma Fanai Adviser leh Pu T. Lalnunsiama Legal Adviser ten thiam takin an sawi. A tawp zanah Pandal hming putchhan Pu Liandala (L) tupa Pu Joseph Lalhimpuia (Ex MLA)-in hun min hmanpui bawk.
Palai hi Zoram hmun hrang hrang atangin mi 800 leh tlem in ziak lut a hriat a ni a. Inziak lut lem lo, mahni ṭhahnemngaihnaa kal leh, a chhehvel khua aṭanga lehlanga inkhawmpui chhim an awm nual bawk.
Kumin Assembly-ah hian MZP Life Member thar mi 18-te hnenah pek a ni a. Palai te atangin zaithiam tak tak zai ngaihthlâk tur a awm bakah, lam thiam tak tak an lam a. Zaipawl bakah College lam atangin Live Band ten an thiam thil an entir bawk a. Women Polytechnic Aizawl (WPA) Students' Union ten Zofa hnam chipeng hrang hrangte incheina (Costume parade) an entir hian lawm a hlawh hle.
Kum danga Culture Programme tia hun hman ṭhin kha, kumin Assembly-ah chuan Mizo hming puttirin, "Zoze chawi Ni" tih a ni a. Darzo Tlang chhip, Tarmita inhmun hluiah zai leh lam nen hun hman a ni a. A hmunin a zir bawk a, Ni in min daih lo a ni ber mai. Khua in min thim hnan hial a ni.
Kumin Assembly chu, Darzo khawtlang inpekna a ropui hle a. In 350 vel lek ni mahse mikhual 800 chuang chu min thleng hneh hle. A ṭhen chuan mikhual an neih tlem thu an sawi a, mikhual neih tlem avangin an lungawi lo hial zawk.
Darzo mai ni loin, Hnahthial District leh a chhehvel-ah hian MZP inkhawmpui hi a vawi khat thlenna ni a hriat a ni a. A kalphung leh awmzia an hre lawk vak lo na chhungin, an lo inhawng lawk hle a. "MZP Assembly– KṬP/TKP inkhawmpui nen a danglamna awmchhun chu lengzem leh hla lenglawng an sa hi a ni" tia comment min pe hian kan inkhawmpui boruak a sawifiah hle in ka hria.
MZP Assembly hi a hlawhtling hle in a hriat a, Palaite haw hnuah pawh Darzo khawtlang titi a luah zui rei hle a. Mithi lumenna leh awmkhawmna apiangah MZP Assembly an hmuh dan Darzo pa hoin an sawi laih laih reng a. Palai te pawhin Social Media kaltlangin nuam an tih thu leh hlawkthlak an tih zia, an kham loh zia an tarlangte hian Assembly hlawhtlin zia a lantir hle.
Liandala hi Mizo literature a thawh hlawk tak, "Kan tlang ram par vulna", "Pipu chhuahtlang hlui", "Aia upate zah thiamin" tih te chu a phuah a ni.