Young Lai Association (YLA) Golden Jubilee a Manga Thomte thusawi

YLA General Conference leh Golden Jubilee lawmna, Chandmary Recreation Center (CRC) Lawngtlai-a

neihah MZP te min sawm angin ni 20 November, 2024 khan va telpui thei a. A hlawkthlak hle mai. 

YLA hian MZP te hetiang an Programme pawimawh takah hian min sawm khat hle a. Keini Programme pawh min telpui khat hle. Chuvângin tel ngei ngei a ṭul kan ti a ni. LSA te nen zawk hian kan thawkho a ni. 

YLA hi kum 1974 khan din a ni a, tlawmngai pawl niin, midang tana inhlan ral pawl a ni. 

YLA Golden Jubilee lawmna hunah chibai bukna hun min pe a. Chuta ka thusawi tlangpui:-

1. Zofate hi, kan chenna hmun a zirin hnam hming kan nei hrang a, kan zavaiin unau kan ni.

2. Mizo bik tumah kan awm lova, kan zavai kalkhawm hian Mizo a siam a ni a. Lai ni chungin a Mizo theih a. Paite, Hmar, Pang, Bawm... ni chungin a Mizo theih a ni. 

3. Kan hnam bil, chi bil humhalh leh tih hmasawn kan tih tur a ni a. Hei hian inlakhranna a kawk lo. Lai hnamin hma a sawn chuan, Zofaten hma kan sawm a ni. Mahni ṭawng theih pawh i humhalh zel ang u.

4. Chutih rual erawh chuan, mahni hnam bil, chi bil chauh hian khawvelah hnam hriattham ni turin kan survive dawn lo. Kan ṭanrual a, Zofa hnam hrang hrangte kan inpumkhat chauhin hnam angin kan dingchhuak ang. 

5. Lai hnam, Lai Ram, Zoram, Zo Hnam tan YLA ding zel se. Lai Culture, zia leh rang chawinungtu ni zel se. Platinum Jubilee mai ni lo Centenary thlenga lawm turin duhsakna ka hlan e.