Zofest hi a vawi 10-nan ni 3-6 December, 2024 khan W. Phaileng-ah hlawhtling taka neih a ni a. Zofest hi
MZP a kan inhman hma daih, 2002 atang khan hman tan a ni a. Zofa— thisen a unau, thlahtu bul thuhmun, thlah khat nisi; ramriin a thendarh avanga unau kan nihna pawh inhre tawhlo te kan in pawh lehzual theh nana he inkhawmpui hi bul ṭan a ni a. Chung lamin mal a sawm a, Zofest hian Zofate inkarah inunauna ṭha a siam teh meuh mai a. A bik takin, Zofate kan inpumkhat loh chuan kan dingchhuak lovang tih pawm tute tan a hlu lehzual.
Kuminah pawh Assam, Manipuri, Tripura, Myanmar, Bangladesh leh USA atangin palai thahnem tak, hnam aiawh an rawn tel thei a. A hlu hle. Kumin Zofest hi a vawi 10-na a ni.
2002, 2004, 2006, 2009, 2012, 2014, 2016, 2018, 2022, 2024-ah te Zofest hi hmun hrang hrangah neih a ni ta a. Heng zingah kum 2012 atanga tel chhoin, vawi 6 ka tel ve ta reng mai. Hruaitute duhsakna changin Organising Committee-ah ka la tel vek a. Organising Asst. Secretary, Programme Coordinator, Information & Publicity, Documentation leh mawhphurna hrang hrang ka lo chelh tawh a. Kumin Zofest-ah hian tling lo tak chungin Organising Secretary atan min ruat thung. Ka tan a va hlu em!!
Zofest hi kút satliah a ni lova, Zofate insuihkhâwm theihna tura MZP hmalakna pawimawh tak a ni. Palaite pawh Zofa hnam hrang hrang, pawl aiawhte an ni hlawm a. Inpumkhat tur chuan, innel, in pawh, in hmelhriat, thil tih ho, lam ho te a ngai hmasa a. Cultural inang tlang kan neihte kan in hriat saka, kan in pawm sak pawh a ṭul a ni. Hei hian a hrinchhuah tur chu insuihkhâwm hi a ni.
He kan hmalakna hrethiam lo a, sum leh pai hautakna chauh min thlir puitute tan chuan thil ṭul lo tak a ni ngei ang. Mahse, rah ṭha tak a chhuah mek zel a. A chhuah zel pawh ka ring.
Social Plugin