Ni 7 May, 2025 (Nilaini) khan Vanapa Hall-ah neih a ni a. Kan hotute duhsakna changin, report leh inhmelhriattirna hun ka hmang. Ka reporte thenkhatte:-
1. MZP chuan, kum 1995 atangin kum tin “HSLC Top-10 a Mizo tlingte chawimawina” hun hi a buatsaih ṭhin a. Kumin hi a vawi 31-na a ni.
2. MZP chuan MBSE hnuaia HSLC Exam Top-10 ah hnam dang thahnem tak a lang ṭhin chu pawi a ti em em a. Mizo zirlaite fuih nan leh cho phur nan hetiang Programme hi a lo dung chhuak a ni. Rah tha tak a chhuah ni pawhin a lang.
3. Top 10-ah phei chuan Mizo zirlaite vek lang thei se tih hi MZP duh dan a ni a. Chutiang tur pawhin duhthu a sam bakah, hma a la thin a. Kuminah mi 2 tih loh chu Mizo Zirlaite vek kan nih avangin MZP chu a lawm em em a ni.
4. MZP chuan 2010 atangin kumtin MZP Inter HS Quiz a buatsaih ṭhin a, chuta rawn telte chuan Result an nei ṭha thin em em a. Kumin a kan chawimawi zinga 5 phei chu MZP inter HS Quiz 2024 participant te an ni nghe nghe a.
5. Kumin HSLC Exam-ah hian, zirlai exam mi 18,946 (Mipa-8,875, Hmeichhia-10,071) an awm a. Pass 14,527 (mipa-6,910, hmeichhia-7,617) an ni. Compartmental Chance nei mi 64 an awm laiin, Fail 4,355 an ni a. 100% fail-na sikul hi 13 an awm a, a pawi hle a ni.
6. Kumin resultah hian za zelah 76.68% in hlawhtlinna an chang a. 2024 khan 73.37% in a pass a. 3% laiin hma kan sawn a ni.
7. Pass zawng zawngte duhsakna ka hlan a, hlawhtling zo ve rihlo te pawh beidawng mai lo a, hmalam pan turin ka ngen a ni.
Social Plugin