ZORAM NI 2025 MZP GS MANGA THOMTE REPORT

Zoram Ni 2025, March ni 5 a Dawrpui Multipurpose Hall-a neihah MZP General Headquarters

General Secretary Pu Chinkhanmanga Thomte report:-

1.   Pu Chairman, Khuallian Pu K. Vanlalvena MP (Rajya Sabha) huaisen, MZP President lo ni tawh. Thupui min sawi sak tu Pu Vanneihtluanga Editor Lengzem, Party hrang hrang aiawh, NGO a kan thawhpuite, College zirlaite leh pi leh puts, Zoram Ni Chibai u.

2.    Introduction-

3.    Zofate’n zalenna famkim kan neih theih nan, kum 1966 March ni 1 khan Mizoram Independence puan a ni a. Chu zalenna humhim tuma India sipai-te nen inbeihna kal zelah, ni 5 March, 1966 khan India Jet Fighter rual ten, nu-nau pawisawilo leh mipuite chu dimdawina tel hauh lovin an bei chiam mai a. Aizawl bakah thingtlang khaw engemawzat a bomb bakah, machine gun hmangin chunglam atangin mipui an kap chiam a. Mi tamtakin nunna an chan a ni.

4.    India sawrkarin a ram chhunga a ngaih, Mizoram leh a mi chengte chu ralpui phiar a phiarin, a ram chhunga a tih ngai loh Jet Fighter meuh hmanga Mizote a beih avangin, MZP chuan India sawrkarin Mizote a sawisak dan chu hleihluak a tiin, hriatthiam har a ti hle a. India sawrkarin Mizote a nghaisak danah thil pangngai aia hleihluak a nih avangin, "India in Mizote lakah ngaihdan dil rawhse" a ti hial a ni.

5.    March ni 5, 1966 a Jet Figher hmanga Mizoram bomb a nih avanga Mizote tawrhna, tahna, zawl khawpui sen mei chan ni, Mizote thlabara kan awmna ni theihnghilh a ni mai tur chu MZP chuan ngaingam lovin. March ni 5 chu, "Zoram Ni" ah a puang a. Kum 2008 atangin kumtin hman a ni ta a ni.

6.    Zoram Ni hmasa ber chu ni 5 March, 2008 khan Vanapa Hall-ah ropui taka hman a ni a, hetih hun laia nunna thapa mipuite thlamuantu, mi chhuanawm tak tak mi sawmpahnih (12) te hnenah chawimawina a hlan a. He ni hman a nih a, a chanchin te sawi thar a nih avangin India Media lian te pawhin an ngaihven thar hle a, National Media hrang hrang te pawhin India thil tihsual lian takah an ngai a. Mizote tawrhna thamral mai tur chu kaihthawh niin , sawi thar a lo ni ta a ni.

7.    Ni 10 August, 2023 khan India PM Modi pawhin, Parliament-ah March ni 5, 1966 chungchang a sawi chhuak a. “Mizote hi India khua leh tui an nilo em ni? An himna chu India mawhphurhna a ni lo em ni? Vawiin thlengin Mizo mipuite rilru a la na a, an la hre reng a ni” a ti a ni.  

8.    Zoram Ni hman chhan erawh chu; Mizote'n he tawrhna hmanga rilru thar pu a, hmalam pan tura infuihna leh inhlantharna ni atan leh hnam hmangaihna (nationalism) a harh tharna a nih a beisei a ni.

9.    Kum 2008 atangin MZP chuan kumtin he hun hi a hmang ziah a; lem inziak siak, hla inphuahsiak, seminar, symposium, kawngzawh, hunserh, inkhawm leh kawng hrang hrangin kumtin hman thin a ni a. Documentary pawh siam a ni tawh bawk.

10. Kuminah chuan “Tho la ding ta che” tih thupuia hmangin, hetiang hun buatsaih a ni a. He ni pual hian Reels insiam siak leh Article inziah siak buatsaih a ni a. Kan hlawkpui ngei kan beisei a ni.