Ni 4 September 2020 (Zirtawpni) khan kum 1 chuang ka lo buaipui tawh, Pu L. Malsawma Colney (L) Biography chu MZP Conference Hall-ah tlangzarh a ni ta.
Kan senior te ka zawh lahin, "a chanchin ziak a duh vak lova," tih kha ka chhanna dawn tam ber a ni si a. Eng hi nge a ropuina tih hriat ka chak hle a, a titi kam lian changa nuih dar dar piah lamah thil tak tak a awm ka ring a, chu chu ziaka chhiar tur a awm si lo khan min cho chhuak a. Vawi khat chu MZP Office-ah; kawm ka duh thu leh, a chanchin chu MZP Chanchinbu a chhuah atan ka duh thu ka hrilh a.
A remtih angin an in (Mission Vengthlang)-ah ni 12 April, 2014 khan nilengin kan in kawm ta a. A sawi apiang ka chhinchhiah zel a, ka zawt zel bawk a. Kan sirah ka nau hruai Awma hian camera in a lo cover reng bawk a.
He kan inkawmna hi MZP CCB. Ṭau thla (Vol. 21, No. 25)-ah tihchhuah a ni a. A mah paw'n a hlut hle in ka hria a, a copy pawh min dil belh hial a ni. 2018 kum tawp lamah ka personal Blog [http://mangathomte.blogspot.com/] ah ka dah chhuak a. Hei hi 2019-a a boral khan a darh (Viral) nasa a, page visitor ringawt pawh a sang tel a tling hial a.
A thihnia, YMA in a chanchin sem tura an siam pawh, he ka personal Blog a ka dah ṭhenkhat hi a ni a, miin min hlusak hle tih ka hriatin phurna ka nei nasa hle a. A hnuah a nupui Pi Mawitei Colney nen inbe rawnin he a chanchin ka lo ziahsa behchhana a bu law law a siam turin rilru ka siam a. Tun hi kan lo thleng ta a ni.
Pu Sawma a Map siam kan hre lar hle a, MNF Movementa a tel te, a fiamthu te hi kan hriat lar leh sawi chhawn tam ber a ni a. Chutih laiin ṭhangthar leh zirlai te'n a chanchin nuihzatthlâk phenah hian zirtur tam tak kan neiin ka hria a. Ram a hmangaihna te, Mizo/Zo Hnam a dah chungnunna te, Ram leh Hnam tana a inpekna te, A Idealogy te, a Principle te, a quality leh a danglam bikna te, a in vawnna leh a PATHIAN ṭihna te, a huaisenna phena a tlawmna nun te hi ZIR THAM a niin ka hria.
Ram tana a tha thawh te, a sulhnu bakah, a ma kutchhuak hrang hrang a hla phuah leh a lehkhathawn te pawh he a Biography ah hian ka khungkhawm a. Keia hriat hi a huap kim dawna ka hriat loh avangin mi hrang hrangin a mah an hmuh dan mi chi hrang hrang (ziaktu lar leh lar lem lo) te ziak dah tel a ni bawk e.
Lo chhiar nge ngei tum la, i feedback dawngsawng turin ka in peih reng e. Kawng khat tala chhiartu te nuna thu a sawi hi ka duh leh ṭawngṭaina a ni e.