Hringnunah hian mahni nihna leh dinhmun inhriat a har hle a. Darthlalangah in en fo mah ila, kan hmel bak a lang si lova. Mahni tawkah hmelṭha vea kan inngaih laiin kan duh ten min lo duh lem lova, miin min lo hmu vantlang lek ṭhin. Kan inhmuh angin miin min hmu lem lo.
Lian ve tawk, thil tithei ve, thu ve tawka kan in hriat lai hian, miin min lo nuih ru tet tet fova. Fing viaua kan inngaih lai hian miin kan hnung lam aṭangin, 'a in tifing', 'a in tihria' 'engmah a hre tak tak lo' te min ti fo a. Chapo nih te hi hlawh awl taka ni.
Mahni nihna hi hriat a har takzet a, mahni leh mahni inbum mai pawh thil awm thei tak a ni. Duh aiin in hmuh len a awl a, lian ta viaua kan inngai lai hian, miin engahmah min lo ngai lo fo ṭhin. Kan bula mi ten tu nge kan nih an hrefiah ṭhin hle a. Kan chhehvêla mite min hmuh dan hi kan nihna a ni duh hle.
Mi tam tak chu hmuh tirhah an felin, an hawihhawm hle a, awihawm tawk leka mi chhawmchhaih an thiam hle. Chutiang mi te chuan nun honaah lawm an hlawh in ngaihnat an hlawh bik a. Mi kan hmuh tirha an awm dan (First Impression) hi a pawimawh rêng a ni. Mahse heng inhmuh tira kan awmdan hi intehna a nih fo laiin, intehna tluantling a ni lem lo.
Mi tam tak chu hmuh tirhah nelawm tak leh awihawm tak ni mahse, belhchian dawl si lo an awm a. Mi ṭhenkhat nelawm loh anga lang, mahse belhchian dawn tak hi an awm bawk. Inbelchiang hmasa lo a mihring inteh hi a rintlak loh hle dawn tihna a. ni.
Chutih laiin kan bula mi te, kan mi kawm te, kan ṭhenawm te, kan hruaitu te, kan ho te leh min kawmtute hian min hrechiangin, kan nihna tak an hre chiang ṭhin hle a. Tu nge kan niha, eng ang mi nge kan nih, mi rintlak kan ni nge, ho deuh kan ni tih pawh kan bula khawsa te hian an hre chiang ber ṭhin.
Chuvangin, min hrechiangtu ten rintlakah min ngaiin, min ngaisang tulh tulh nge?, min hrechiang tu apiang ten min ring lo tulh tulh?, tihah hian tu nge ka nih a chiang ber awm e.