R. VANLAWMA

    Ka mi ngaihsan em em, ka ralkhat hriat– Pu R. Vanlawma hriatrengna lungphun, Maubuang Branch YMA in an siam hawnna hunah MZP aiawhin ka tel a. Mimal takin ka hlawkpui hle.  

    He hunah hian pawl aiawhin kan tel a, thusawina hun min pek angin, ka thusawi tlangpui ka han dahṭha ang e (nakina hailetah)–

1. Maubuang khawtlang (YMA)-in hetianga in khaw tlangval, khaw chhuak chawimawi nachang leh a hming daih loh nana hma in la hi in fakawm ka ti hle. 

2. Vawiinah hian ka inti tlangnel khawp mai, a chhan chu–

i) MZP a kan hruaitu hlui thahnem tak ka hmu a.

ii) Kan kalkhawm chhan ber, Pu R. Vanlawma (L) hi MZP Life Time Adviser (thih thlenga Adviser) a nih avangin.

iii) Kan Programme hmanna, hming putchhan Awithangpa hi, "MZP changrel a sual ngai lo....." tih chham chhuaktu a nih avangin. (MZP kan lo tel hi a inhmeh hle...)

3. Pu R. Vanlawma puala hun hmang ni mah ila, kei chuan a hring a hranin ka hrawn ve hman lova. Chuvangin, a chanchin sawi tur ka hre ve lo.

4. A hming erawh ka hriatna a rei tawh a, ka hriat dan chu– Ram leh Hnam hmangaihtu, Ram vei mi, Zofate hmasawnna duhtu, Zofate insuihkhâwmna vei mi a ni.

5. MZP a ka inhman tirhin kan senior te'n, Pu Vanlawma chu a zin hlana, a inhmanna pawlin Meeting an koh chuan, 'ka tello in engtin nge ram ro an rel ang' tiin a haw vang vang ṭhin e an tia. Zir tur kan neiin ka hria. Mahni nihna/ mawhphurna a mawh la ngam mi a ni.

6. 1993 a MZP siamṭhat a nih aṭang khan, Pu R. Vanlawma leh Pu L. Malsawma Colney-te chu Adviser-ah ruat an ni a. An thawk tawp thlengin MZP min uap ve ve a, MZP huang chhungah chuan kan ngaihlu hle a ni. Pu Colneya phei chuan, Vanlawma nen MZP Life Time Adviser kan ni a, ban thiang kan ni lo a ti thin. Kan ngaisang hle a, kan thlamuanpui em em thin a ni. Chanchin an ngah dun hle.... 

7. MZP chu zirlai pawl kan ni a, chutih laiin kan ram leh hnam kan vei a. Zofate insuihkhâwm kan tuipui a. India, Myanmar leh Bangladesh awp chhunga Zofate kan insuihkhâwm theih nan thiam ang angin hma kan la a. Zofest te buatsaihin, Zofa chi peng hrang hrang kan in kuahkhawm mek a ni. Heng kan hmalaknate hi kan sawi tak Pu L. Malsawma Colney leh Pu R. Vanlawma ten an vei em em, an tuipui em em leh an hun tam zawka an buaipui thil a ni a. Kan thinlung leh thisenah an ni hian an tuh tlat a ni. 

8. Kan Life Time Adviser te pahnih hi he khawvelaah hian awm tawh lo mahse, an hmathlir leh an duhthusamte hi keini an naute hian kan bawhzui zel a. Kan ngaipawimawh em em a ni. Kan la ngaihpawimawh zel dawn bawk.