 |
| Manga Thomte, GS MZP-GHQ Ni 24-26 September, 2024 khan MZP Assembly vawi 68-na chu, Champhai Tlangsam-ah tluang taka neih a ni a. Palai kan kal ṭha hle. |
Pu Lalduhoma @lalduhoma_official CM leh Pu K. Sapdanga HM te chu khuallian an ni a. Pu Lalmuanpuia Punte Adviser to CM chu Uaptu niin, Pu Cement Lalhmingthanga bialtu MLA chu Assembly thlengtu a ni.
MZP Headquarter 13 President te a kim ṭhap thei kha a ropui a, ka hriat chinah SHQ pawh a tel ṭhat ber ṭum a ni. College lam an rawn thawh hlawk hle a, Affiliated Hnampual zirlai pawl an rawn tel ṭha hle bawk.
Cultural Troupe/ Club- 18 laiin hnam lam chi hrang hrang an rawn entir a. Hnampual, Hqrs., Shq., Br., College atangin zai- 9 awmin, Live Band- 4 leh Zaipawl (Choir)- 2 bakah Custom Parade- 1 a awm. Kan hunin min daih meuh lo a ni e.
Rorel inkhawmah palai kan kal ṭha a, engtik lai pawhin Pandal kan khat reng mai hi a lawmawm hle bawk. Khua chhe deuh mahse, Programme vawi 1 mah bahlah lovin kan zo thei hi chunglam zahngaihna a ni.
MZP GHQ ka inhman hnua Assembly neihnate (2016 tih loh chu ka la kal kim vek a ni):-
2010- Zawlnuam
2012- East Lungdar
2014- Farkawn
2016- Kawrthah (Ka kal lo)
2018- Saitual
2020- Covid 19 vangin nei lo
2022- Darzo
2024- Champhai Tlângsam
He huna MZP General Secretary ka nih anga ka report chu hetiang hi a ni:-
THUHMAHRUAI
Mizo Zirlai Pawl hi kum 1935 October, ni 27 khan Mizo zirlaite hmakhua ngaihtuah tur leh, Zirlaite dikna chanvo humhalh turin Mizo lehkhathiam hmasa ten an lo din a ni.
Chung Khuanu venna zarah MZP chu kum 89 a upa a lo ni ta reng mai a. Indopui avangte, Tam tlak avangte, Politics inlumlet avangte leh Zoram-in zalenna a sual avangte-in MZP chu tluk leh din fawm chungin, Mizo Ram leh Hnam tan hna tam tak a lo thawk tawh a, mi tam takin sawi nep tumin, nek deuh sawk sawk thin mahse a kal ngaiin vawiin thlengin a la kal reng a ni.
MZP Assembly vawi 68-na chu dam takin kan lo thleng leh ta a. Assembly pualin tun term atana mawhphurhna kan lak October, 2023 atanga, August, 2024 thleng MZP dinhmun tarlanna Report Bu kan rawn siam a ni.
He Report Bu-ah hian MZP dinhmun tlangpui tarlan a ni a, tunhmaa tel ngai lo Headquarters Report pawh rawn dah tel a ni.
Report pe thei tura mal min sawmtu Pathian chungah lawmthu awm se. Kawng engkima min tawiawmtu Pu C. Lalhmingsanga Asst. General Secretary leh ka O.B puite, General Headquarters, Headquarters, Sub Headquarters, Branch, Hnampual zirlai pawl leh College hrang hranga zirlai pawl kan thawhpuite zawng zawng chungah lawmthu ka sawi bawk a ni.
MZP kaltlangin kan Ram leh Hnam leh Mizo Zirlaite tan ke i pen ho zel ang u. Tanrual hi chakna a ni. Ka lawm e.
Sd/-
(CHINKHANMANGA THOMTE)
General Secretary
Download:-
1. MZP Assembly vawi 68-na, Report Bu 2023-2024
2. MZP Assembly vawi 68-na, Hla Bu 2024
Social Plugin